Nampianjoria ahy i Lisy

HAFATRA MIAFINA

21 septambra 2016, andro tokony tokony ho tamin’ny sivy maraina. Naneno tokana ny telefaoniko. Hafatra miafina nipoitra teo amin’ny efijoron’ity farany. Avy hatrany dia novakiako. Izaho rahateo vao nifoha, mbola malaina handinika ity rehetra ho atao mandritry ny tontolo andro.

Nanontany ahy i Mossieur Njo, izay tsy zoviana amin-tsika intsony fa mpanoratra malagasy manan-talenta tokoa, hoe hamoaka ny bokiny voalohany, hoe afaka ravahako sary ve ny fonony. Avy hatrany dia nekeko, moa koa anisan’ny asa tena mahafinaritra ahy ny tontolon’ny boky sy izay misasika azy.

Ny famintinana ilay tantara nalefany tamiko koa dia tena nahasarika tanteraka. Hafa kely ilay tantara, toa misy Antananarivo nefa tsy Antananarivo, nefa Antananarivo ihany raha tena dinihana. Antananarivo hafa kely. Hiverenako etsy ambany ny momba izay rehefa avy eo. Efa ela manko ny tena no te hamaky boky amin’ny teny gasy. Ny vitsy ananako ato an-trano efa voavakiko avokoa, saingy tsy ampy ny rantsan-tanako anisako ny taona nierina namakiako azy ireny taloha.

Nandeha ny fotoana, vita ny asako, ary nivoaka ny bokiny, Lisy Mianjoria.

Mailaka ery ny hanjifa ny vita malagasy. Nalefa ny zesta, ny selifia miaraka amin’ny boky erak’iny fesiboky rehetra iny milaza hoe izaho koa mba manana. Amin’io ny tarehy sy ny bagon’ny volo no nokajiana mba ho tsaratsara vao ilay boky nadera.

FITIAVANA

Nandeha ny fotoana, nierina ny taona, nierina in-droa vao namaky ny pejy voalohany.

6 aogositra 2018, amin’ny roa latsaha folo atoandro, avy nolalovan’ny masoko ny soratra niraikitra teo amin’ny pejy farany.

Mandrehitra sigara kely aho amin’izao fotoana hanoratako izao. Mbola feno manko ny foko sy ny saiko avy nivoaka tao anatin’ity boky manga ity, ka mila fotoana kely aho handaminako ny fihetsem-poko izay ho raiketiko ho soratra.

Ny fitiavana no nanombohako ito boky ity, ny fitiavana tantara, ny fitiavana ny teny malagasy, ny fitiavana manonofy, ny fitiavana hiala amin’ny andavanandro, ny fitiavana hanana fijery hafa amin’ny fiainana, ary ny fitiavana hizara izany no amaranako azy.

MENATRA AHO

Raha ny zavatra tsapako voalohany, dia menatra tena menatra ny tenako aho, satria tsy vitan’ny sahirana namaky teny gasy, fa kofona sy nihisatra, tsy misosa toy ny rano an-damosin-gana. Menatra aho fa ny tsy haiko ny teniko, haiko ihany fa nila fandinihana ela vao azoko ny sasany. Toy ny miarahaba mamba ka tsy fitia fa tahotra no tsapako voalohany. Matahotra ny zavatra ho fantatro momba ahy, indrindra fa ny hoe tsy haiko ny teniko. Ary tsy in-dray, tsy in-droa no saika nadaboko tany ity boky ity satria sahirana aho. Faly sahirana satria liana tamin’ny tantara nefa ela dia ela ny namakiako azy. Isaky avy mamelatra ilay boky dia manisa hoe firy pejy no vitako, iray, roa, telo, efatra, dimy, folo, zato, etsetra. Ary nampitahako tamin’ny famakiko boky vahiny, alina iray dia mahavita pejy maro. Nahiliko tany anefa izany eritreritra izany nony nandeha ny fotoana nidirako tao anatin’ny tantara.

LISY MIANJORIA

Lisy Mianjoria dia … (aza matahotra fa tsy ho tantaraiko anao akory ny fiafaran’ny tantara, na koa hoe ho teneniko anao ny pitsopitsony) … tantara izay ahitana an’i Lisy, sy Rabe. Lazaina hoe ankizy, nefa tsy tena ankizy. Samy avy eto Antananarivo, nefa Antananarivo samy hafa (sa samihafa no fanoratra azy ? mamelà ahy ary ahitsio aho raha diso). Samy manana ny Madagasikarany, ary Anosy no toerana anisan’ny fototry ny tantara. Eny, io Anosy maloto sy voretra io, fanarian’ny olona fako, manja rehefa jerena lavitra nefa mahasorena rehefa andalovana. Samy manana ny fiainany i Lisy sy Rabe, ary samihafa (eo indray mba ahitsio azafady fa sahirana tanteraka) fomba fiaina, nefa hifanojo mandritry ny pejy marobe ny fiainan’izy ireo.

I Lisy manavotra an-dRabe, moa Rabe manavotra an’i Lisy. Tanora roa ampifandraisin’ny taloha, ny ankehitriny, ny ho avy, ny fifanadalàna, ny fampitahana, ary ny lehibe indrindra : ny fifankatiavana.

Lisy Mianjoria dia nahitako Madagasikara hafa kely, ilay Madakasikaran’ny nofy atoandro sy ny revin-gadra, nefa Madagasikara azo heverina fa tokony hisy. Kely tokoa manko ny fanantenako raha izaho manokana. Fa rehefa nofaritan’i Môssieur Njo mazava tsara nefa ity Madagasikara hafa kely ity, dia tena azoko sary an-tsaina tanteraka. Ary io famaritana io no anisan’ny zavatra tiako voalohany tao anatin’ity boky ity. Na ny saro-takarina aza takatro an-tsaina, ny tsy hitako lasa hitako mazava.

Satria voafaritra tsara ny toerana sy ny fotoana, dia hitako hatramin’ny tranon-dRabe, ny lalana nizorany teto Antananarivo sy ny sisa. Tena mazava sy mangatsakatsaka toy ny rano.

Manarak’izay, tiako ny toerana omen’ny mpanoratra ny mpamaky anatin’ny bokiny, satria tafaronjona tanteraka tao anatin’ny tantara aho. Mbetika aho mahatsiaro tena ho Lisy rehefa izy mafy loha izay, mbetika mhatsiaro eo amin’ny teoran-dRabe rehefa izy manao fiteny vary amin’anana (« …Efa hoe j’aime pas ireto sotro sy fourchette malemy kely ireto,…), na izy rehefa mitavozavoza sy mihanahana manao zavatra.

Lisy Mianjoria dia nahafantarako indray ny tsy tadidiko taloha nefa tokony ho haiko, ary nahalalako zava-baovao ihany koa.

Maoderina tanteraka ny tantara, nefa koa tsy manadino ny lasa sy ireo kolon-tsaina maha-malagasy. Ao ihany koa ireo voambolana tsy mahazatra ny sofiko, ary tsy haiko raha tsy nieritreritra aho, ka lasa mahafinaritra ahy ny mampiasa azy (oh : efijoro = écran).

Ary farany, ny anisany tena hitiavako ity boky ity dia hitako tao daholo ny karazana fihetsem-po. Nisy fotoana nihomehy irery aho eo an-davarangana mamaky boky; nisy fotoana sorena tanteraka fa sady maisatra ny masoko mamaky amin’ny alina (ny jiroko rahateo koa tsy dia mazava fa mitsilopilopy), no misy fotoana tsapako lava ny fehezanteny; nisy fotoana faly tena faly mamaky boky, indrindra moa rehefa mangala-potoana amin’ny asa iny ho mamaky azy; nisy fotoana nalahelo (tsy teneniko hoe taiza ho aiza tao anatin’ny tantara :)), ary nisy fotoana velom-panantenana.

Ny indro kely kosa dia ireto :

Asa na izaho no mihisatra mamaky, na ny fehezanteny sasany no tena lava. Inoako fa avy amiko ny fahadisoana fa tsy avy amin’ny mpanoratra. Nefa tena nahatsapa sempotra ihany aho nisy fotoana.

Ankoatr’izay, somary misy diso tsipelina kely eny antsefatsefany eny dia somary mandiso ny hevitry ny tiana ambara, raha tsy averina vakiana tsara.

Ary farany, misy fanamarihana kely iray izay ho resahiko manokana amin’ny mpanoratra angamba satria manjary mitantara ny tsy mbola tokony ho tantaraina aho, indrindra raha mbola tsy namaky ianao.

Hafatra ho an’i Môssieur Njo : Misaotra anao nanoratra tantara tena mahafinaritra sy mahazendana, misaotra ihany koa mamelona ny teny malagasy.Ary rehefa sendra mifanena aminao Rabe, dia mba afaro izy hoe tsy irery izy fa misy namana hanadio an’ny ranon’Anosy 😉 Dia indro misy sary kely mba omeo azy mandra-pahavita an’izay tokony ho atao 🙂

Mankasitra e !!

PS: raha mbola tsy tapa-kevitra ianao hoe tena hafa kely ity boky ity, dia izao no lazaiko aminao… Misy zavatra tsy ampoizinao ao, Misy tononkiran’i Nicky Larson ao ananonanona ao ohatra 😉

Catmouse.

Publicités

5 réflexions sur “Nampianjoria ahy i Lisy

    • Ny « olona » dia izao. Lafo tokoa ny manao BD ary sarotra ny mivarotra azy na dia amin’ny teny vahiny be mpahafantatra azy ka vao maika aza teny gasy vitsy miteny. Raha ohatra ka be ny mitady dia azo atao tokoa. Raha tsy zany dia any aoriana any no afaka manao an’io fandikana amin’ny teny gasy io, dia « auto-édition » no hanaovana azy.

      J'aime

  1. Izaho mino hoe betsaka ny liana amin’izany! Efa maro no te-hamaky teny Malagasy izao (mifoha ny hambo-mpo sy ny fitiavan-tanindrazana). Anontanio ange i Môssieur Njo e! Ny votoatin’ny tantara mahasarika ary ny sary koa raitra rahateo!

    Aimé par 1 personne

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s